پاکستان میں سالانہ آبادی نیوزی لینڈکی کل آبادی جتنی بڑھ رہی ہے، وفاقی وزیر صحت

وفاقی وزیر صحت مصطفیٰ کمال کا کہنا ہےکہ پاکستان میں سالانہ  آبادی نیوزی لینڈ کی کل آبادی جتنی بڑھ رہی ہے۔

اسلام آباد میں  طبی آلات کی لائسنسنگ  اور  رجسٹریشن کے ڈیجیٹل سسٹم کے افتتاح کے موقع  پر خطاب کرتے ہوئے مصطفی کمال کا کہنا تھا کہ پاکستان کی آبادی بڑھنے کی شرح 3.6فیصد ہے، ہم ہر سال نیوزی لینڈ جتنی آبادی کا اضافہ اپنے ملک میں کر رہے ہیں۔

مصطفی کمال کا کہنا تھا کہ  وزیراعظم  نے آبادی  سے متعلق ایک اعلیٰ سطح کی کمیٹی بنائی ہے، ایک انٹیگریٹڈ سسٹم لانچ کرنے جا رہے ہیں تاکہ ہر مریض کو دیکھا جاسکے، ہم عوام کے لیے سہولت اور بہتری کے لیےکوشاں ہیں۔

وفاقی وزیر صحت کا کہنا تھا کہ  پاکستان میں میڈیکل آلات کی رجسٹریشن مشکل کام تھا، میڈیکل ڈیوائسز کی ریگولرائزیشن کے لیے سفارشی کلچر ختم کردیا ہے، وزیراعظم بہت قابل ہیں، وزیراعلیٰ رہ چکے ہیں انہیں بہت کچھ پتا ہے۔

مصطفیٰ کمال کا کہنا تھا کہ 68 فیصد  بیماریاں گندا پانی پینے  سے  پیدا ہوتی ہیں، بچوں کے کینسر کے  وارڈ  میں جائیں تو دل دہل جاتا ہے، مریض کو مریض بننے سے بچانا چاہتے ہیں، ہمارا  جو سسٹم ہے وہ ایسا ہےکہ ہم مریض کا اسپتال میں انتظار کر رہے ہوتے ہیں، ہماری کوشش ہے کہ شہریوں کو مریض بننے سے روکیں۔